ZION TLANG BANTUK
“Bawipa aa bochan mi cu Zion Tlang bantuk an si; Zion Tlang cu hninh khawh zong a si lo i ṭhial khawh zong a si lo mi bantuk an si. Tlang nih Jerusalem khua kha an kulh bangin, Bawipa nih a mi cu a kulh hna, atu thawk in zungzal tiang a kulh hna.” Salm 125:1-2
Bawipa aa bochan mi hna cu Zion Tlang he a kan tahchunh. Zion Tlang cu zei bantuk dah a si? A tlang maw a feh tuk hnga? A tlang maw a sang tuk hnga? A tlang maw a lian tuk hnga? Bawipa aa bochan mi he tahchunh mi tlang cu khuaruahhar tlang pakhat khat a si ṭheu lai.
Zion Tlang cu Jerusalem ah a ummi Tlang te khi a si ko. Amah tlang ah khuaruahhar awk thil pakhat hmanh a um lo. Zion ti mi biafang cu Bible chung ah voi tampi hmuh a si i, hla zong sak ngai mi a si. Zion biafang chim tik paoh ah Jerusalem khualipi kha a chim hnawh mi a si ko. Tahchunhnak ah Zion fanu/fapa, Zion khua lei ah kan kal lio tbk in hla ah kan sak tawn. Zion Tlang (Jerusalem) cu vawlei dang nak in a vawlei zong a hak hlei in a fek hlei lo.
Zion Tlang (Jerusalem) cu:
- Zion Tlang cung i a bawiṭhutdan a chiatu Lian Ngan Bik Bawipa nih cun, kannih Israwel mi hna caah hmelchunhnak ah a kan ser. Isaiah 8:18
- Na rak umnak Zion Tlang zong kha philh hlah. Salm 74:2
- Jerusalem khua Zion Tlang in a uk lai i a sunparnak cu an upa hna nih khan an hmuh lai. Isaiah 24:23
- Bawipa nih aa thawh i, “Zion ka tlang thiang cungah ka siangpahrang cu ka chiah cang,” a ti. Salm 2:6
Zion Tlang hnih khawh zong a si lo i ṭhial khawh zong a si lo nak cu a tlang a feh tuk ca’h le a sang tuk ca’h siloin Bawipa nih a khua ah a ser i, a Bawi ṭhutdan a chiah nak a si ca’h a si. Bawipa umnak khua le tlang a si ca’h a tlang (khua) ruang ah hnih khawh le ṭhial khawh lo siloin Bawipa ruang tu ah a si.
Cu bantuk in kannih zong kan nunnak ah Bawipa nih hmunhma a lak i a Bawi ṭhutdan a chiahnak a si ahcun zeihmanh nih ṭhial le hninh khawh kan si ve lai lo. Vawlei nih a chuahpi mi harnak, fahnak, ngaihchiatnak nih a kan ṭhial in a kan hnin kho lai lo. Kanmah kan ṭhawn, kan rum, kan fim, kan thiam ruang ah siloin kan chung ah a ummi Bawipa ruang ah (thawngin) hnih le ṭhial khawh kan si lai lo.
Pathian daihnak nan dihlak cung ah um ko seh.