No comments yet

THLUACHUAH LETHNIH

Pathian nih Israelmi hna kha Egypt ram sal taannak hmun in Moses hmangin a hruai hna ah khan, Pathian nih an pupa hna sinah a rak kamhmi hna Kanaan ram phanhnak dingah ni 11  kal te lawng a si ko nain, kum 40 chung an rau. Pathian nih a tinhpiakmi hna le siter a duhmi hna cu an hmailei zohchih in ding tein karhlan kha a si. Asinain Israelmi hna cu ram car chungah le tlangtang ah  an hmailei kal thiam lo in an i hel lengmang ko. Cu tikah an khuaruahnak thazang a der, an ing a puang, Pathian ṭhatnak kha ruat kho lo in an tonmi harnak lawng kha an ruat, an hruaitu cungah le Pathian cungah khan phunzainak in an khat, Pathian nih a pekmi hna Kanaan ram phanh khawhnak dingah  khuaruah khawhnak thazang ngei loin lampi ah an tonmi harnak chungah khua an sa.

Pathian nih a philh hna a si hnga maw? sinaisai hlah, Pathian nih a philh hna lo, Pathian nih thluachuah lethnih tincoter tu kha a tinh piakmi hna a si deuh. “Hi tlangah hin sau nawn nan um ko cang, imer ulaw, i thawh ulaw, … zohmanh u ram cu nan hmaiah ka chiah cang; nan pupa Abraham, Isak le Jacob sinah Bawipa nih anmah le an hnu i an tefa hna sinah pek awkin chiat a sermi ram ah cun va lut ulaw, va co u, tiah a ti” ( Deut. 1:6,8).

Nihin ah a thar tein thazang pek kan duh hna, a luancia mi nan nunnak ah zeidah na ton i, zeibantuk ngeihchiatnak, thangchiatnak, zawtfahnak le  hmailei ah nai tinhmi phan kho lo in an tlaitu thil hna kha biapi an si lo. Nihin cu Pathian nih sunglawi tein le man ngei ding tein a kan pekmi nithar, caan thar le sinak thar he hman dingmi NI a si. Ramcar le tlangtang ah ihel peng kha si loin, hmailei ah nunning thar le sining thar he kan Pathian nih hmun khat teah caan hmanṭi a kan  duh. Kan Pathian nih a bia hmang in hi tihin bia a kan kamh, “ Na ningzahnak le na thangchiatnak cu a dong cang. Nangmah ram teah khan na um cang lai i na rumnak cu a lethnih in a ṭhang lai; na lawmhnak cu zungzal in a hmun lai” (Isaiah 61:7). Amen. Na khuaruahnak kha a thar in thleng, Na nunnak kha mer ṭhan law, cucu thluachuah lethnih kan hmuhnak ding caah LAM hruaitu a si. Pathian nih thlen khawh lo mi zeihmanh a ngei lo. Kan ngeihchiatnak cu lunglawmhnak lamnak ah a kan thlen piak kho tu cu kan Pathian a si (Salm 30:11)

Kan Pathian nih vawlei ah kan tonmi harnak nakin kan hmaiah a kan chiahpiakmi hna hi a lethnih in a ngan deuh i a ṭha deuh. Nang cu vawlei ah mi teitu le mi lianngan si dingin Pathian nih sermi na si kha philh hlah. Vawlei le a sin in a rami harnak nih a tei khawh lomi, LIANNGAN BIK PATHIAN, CHAMBAUNAK LE NGEIHLO MI ZEIHMANH UM LO IN KAN CAAH TLING TEIN A NGEI DIH TU PATHIAN KAN NGEI.

 

Pathian pekmi ni sunglawi hmang nuam hna ulaw …