No comments yet

TEINAK PETU PATHIAN

Minung kan sinak ahhin voitampi cu kanmah le kanmah hi kan ibochan ngam tawn lo, i midangtu kha kan i bochan deuh tawn hna, asinain cu cu kan teinak a si tawn lem lo. Minung cu a kan deuhtu lehlam ah an cang tawn.
Khrihfami hna kan dirhmun tu ah cun kan teinak hi kanmah le kanmah kan ibochannak ah si lo in Kan caah khua a kan khanpiaktu Pathain, kan ibohan nakah teinak hi hmuh a si deuh. Kanmah kan ibochan chung paoh cu, kan tla deudeuh, kan i zum deuhdeuh nain kan niam deuh deuh. Kan Pathian nihhin amah bochuntu si ding le amah thawngin tetu si ding hi a kan duh zungzal.

Pathian kan i hngatchannak le i bochannak nih a chuahpi mi hna;
1. Pathian kut chungah kan him ko ti kha fiangtein a kan hngalhter lawng siloin, harnak chungah lomhnak le hnangamnak he him tein a kan um ter. Luatnak a kan pek ( Lam. 16:25 ).

2. Pathian kan ibochannak nih amah mithmai a kan kawlter. 2 Cor.5:5-10 “ …… 9 cucaah hika kan inn i kan um zongah khika kan inn i kan um a si zongah zeidang nakin kan duh bikmi cu amah duhnak tuah kha a si……4:18 kannih nih kan izohchihmi cu hmuh khawhmi thil hi siloin hmuh khawh lomi thil khi an si.” Caan tawite harnak men nih kan nunnak hi a rawkter lai lo, teitu kan sinak dingah Pathian mithmai a kan kawltertu an si.

3. Pathian kan i bochannak nih tihnak in a kan luatter lawng siloin teinak a kan pek
Biaceihtu 7:2-3, 15 Gideon nih Pathian ai bochannak thawngin ralkap 300 he Midian ral a tei hna. Pathian bochannak le zumhnak a nei lomi hna minung 22000 kha a kir ter hna i ralrinnak thinlung a nei lo mi 9700 zong kha a kirter than hna. Gideon nih a theihtuk mi Midian ral hna cu amah thazang in ka tei kho hna lo ti kha ai fiangtuk, amah thazang a zoh tikah tihnak in a khat, atuahmi tu cu Pathian nih a chimhning tein tuah le tuan kha a si. Gideon cu Pathian bia a zumhnak le ai bochannak nih teinak a phanhter . Pathian ai bochannak nih amah nih Midian mi a tih hna nakin Midian ral hna nih an tih deuh kha a theihter Verse 13-15. Gideon nih Pathian cungah zumh ngamnak a ngei i tihnak ngei lo in ralthatnak in a khah than tikah, vawlei hriamnam siloin Pathian fialmi, Pathian pekmi hriamnam hmang in raltuk nakah teinak a hmuh.

Nihin ah nangmah le keimah zong kan teinak cu kanmah thawnnak, fimnak, thiamnak le theihnak ah siloin kan leiah a tang zungzal tu kan Pathian thawng lawnglawng in a si. Amah he cun zeizong te hi a si kho ko (Matt.19:26). Kan hmai ah a um mi tihnak, vanchiatnak, thihnak hna le damlonak hna hi raltha tein kan ton ngam nakhnga zumh feknak in pe ko hna seh.