REMNAK

“Mi le mi karlak ah remnak a sertu cu thluachuahmi nan va si dah! Pathian nih ka fa tiah an ti hna lai.”

Matthai 5:9

 

Thluachuah a pek cia mi a Bia nung kan rel than tikah Bawipa nih a thar in theitu vialte kan nunnak ah thluachuah kan pek piak than ko seh.

Biahmaithi: Remnak hi Bible chungah phun 2 in a um. Pathian le minung karlak ah remnak le minung le minung karlak ah remnak tiah a um.

Pathian le minung karlak ah remnnak:

Biakam hlun chungah Pathian sinah tlangbawi nih rai a thawimi phun tampi a um. Khangh thawinak , Changvut thawinnak, Daihnak thawinak, Sual thawinak tiah Raithawinak tam deuh cu tlangbawi nih nifate a thawi mi, zarhfate a thawimi le thla fate a thawimi . Raithawinak phun khat cu  Remnak ni tiah auh a si. Cu khangthawinak cu kum (1) ah voikhat lawng tuah a si. Kum 1 ah voikhat lawng tuahmi a si caah Remnak ni caah tlangbawi nih a duh poah thil hruk a ngah lo. Thiang tein aa kholh dih hnuah La hmangthia in tahmi angki, tawhrolh, tawisawm le lupawng (luchinh) in aa thuam lai.

Israel miphun caah Remnak ni a tuah hlan ah Tlangbawi nih a mah le a innchungkhar caah sual thawinak a tuah hmasa lai. A mah le a innchungkhar caah sual thawinak a tuah hnu ah Israel miphun caah Remnak ni a tuah lai. Israel miphun pawl caah mehek pahnih a lak lai. Tlangbawi nih meheh pahnih hna cungah camcawh fung a khiah lai i Camcawh fung pakhat cu Bawipa caah a si lai a dang pakhat cu Azazel caah a si lai. Bawipa caah camcawh fung a tla mi cu Aaron nih a thah lai i, Azazel ca camcawh fung a tlaknak meheh cu a cungah remnak ser awk ah a nung in Bawipa hmai ah chuah pi a si.

Aron nih meheh pakhat cu a thah lai i a thi cu velngeihnak thudenh (Mercy Seat) ah voi-7 a theh lai. Velngeihnak thudenh umnak ah Aaron dah ti lo cu ahohmanh luh khawh a si lo. Thi voi-7 a theh hnu ah a thahmi meheh cu Bawipa sinah pekchanhnak a tuah lai i, cu hnu lawng ah Israel pawl an thian lonak, phungbuarnak, an sualnak vialte a ngaihthiam hna lai.

Judah mi tlangbawi ngan cu kum fate in hmun thiang bik chung ah khan sathi he a lut lengmang (Heb 9:25). Israel pawl an thianlonak, phungbuarnak, an sualnak caah kum 1 ah voi khat lengmang Tlangbawi ngan nih rai a thawi piak hna a hau. A thawi piak hna hnu lawng ah Pathian he remnak an ngei kho.

Biakam hlun chungah cun tlangbawi ngan nih raithawinak a ngeih piak hna hnu lawng ah Pathian le a mi hna cu rem ter an rak si. Remnak vialte lak ah a herh bik mi cu Pathian le a ser mi hna remhnak hi a si. Cu remnak cu Jesuh nih misual kan caah a kan ser piak cang. Bible chung ah remhnak phun khat cu a tu kan chim mi hi a si.

A dang remnak pakhat cu minung le minung karlak ah remnak hi a si. Minung le minung karlak ah remnak hi kan Bawipa Jesuh nih biapi taktak ah a chiah mi a si. Cucu a tanglei Bible cacang hin hmuh khawh a si.

Matthai 5:23-24 “ Pathian sin ah na laksawng cu biaktheng cung i pekchanh na zalh tikah na unau pakhat khat kha na cungah thinhunnak a ngei ti na hun hngalh ahcun biaktheng hmai ah na laksawng cu chia ta law na unau he remnak va tuah, cu hnu ah ra than law Pathian sinah na laksawng cu va pe.”

Kan Bawipa Jesuh chan lioah hin, Israel mi nih thil biapi ah an chiahmi le an i lungsak ngaimi cu biaktheng hmai ah Pathian laksawng rak pe hi a si. Biaktheng hmai ah Pathian caah laksawng an pek tikah an lung an rak i hmuih tuk mi a si. Kan Bawipa Jesuh nih Pathian caah laksawng pek nakin biapi deuh ah a chiah hmasa mi cu unau pakhat le pakhat karlak ah remnak tuah hmasa hi a si.

Keimah ruang ah mi maw an i daw, asiloah an i si dah? Keimah ruangah buainak a chuak maw? Keimah ruangah i huatnak a chuak maw? Keimah ruangah remlonak a chuak maw? Keimah ruangah miphun le khrihfabu ah i thennak a chuak maw?

Pathian fa tiah auhmi/kawhmi hna cu mi le mi karlak ah remnak a sertu kan si. Aa hmu thiam lomi hna nih an i hmuh thiamnak hnga remhnak a sertu kan si. Buainak a chuah tikah buainak mei a hmittu kan si. Huatnak a um tikah dawtnak tlaici a tuhtu kan si.

Matthai 5:9 hi Pathian fa zeitindah ( How to become Children of God) kan si lai tinak kong a chim mi a si lo. Pathian fale cu remnak a sertu kan sinak kong tu a chim duh mi a si. Pathian fa cu zeitindah kan si ti mi cu Johan 1:12 “ Jesuh a zum mi hna poah Pathian fa cannak nawl a pek hna.” Galati 5:26 “ Khrih Jesuh pehtlaihnak thawngin Pathian fa nan dihlak in nan si cu nan zumhnak thawngin a si.”

Pathian fa kan sinak cu Khrih Jesuh kan zumhnak thawng lawnglawng in a si. Khrih zumtu poah nih Pathian cu ka pa tinak nawl kan ngei. Kannih zong a fa ah kan cang. Zumtu dang vialte hi kan u, kan nau an si dih. Innchungkhar pakhat kan si. Khrihfabu cu kan thlarau rawl inn a si.

Chungkhar pakhat kan si bantukin “ keimah nih kan dawt hna bantukin pakhat le pakhat i daw uh tiah (John 13:35) chungah Jesuh nih a kan cawnpiak.

Pathian fa kan sinak a langhtertu cu remnak a duhmi kan sinak hi a si. Pathian fale cu remnak a sertu /a thawktu kan si a hau. Kan palh zongah palh lo zongah remnak a um khawhnak hnga kanmah i peih hmasa a hau.

India ram ah sianginn ka rak kai lio ah Kalapa nih camipuai tuah lai ah ka ca a rak ka hlan. Camipuai a si deng cang cauk na ka hlanmi kha rak ka pe cang law, ca zoh ka duh ve cang tiah ka rak ti. Ka cauk a hlaanmi cu a ka pek duh lo hlei ah ka duh ahcun na cauk zong ka thleh lai tiah a rak ka ti. Ram dang in a ra mi, phunning lo in sianginn kai mi na si caah kan thah zong ah India cozah nih an ka tlai lai lo tiah a rak ka ti. Ka lung a rak fak tuk caah fak ngai in kan rak i si, kan rak i zuan hnawh. Kan umnak khan (room) ah ka va kal i, thlacamnak kan ngeih hnu-ah Pathian bia ka sinah a ra mi cu, “ Na ral kha va daw hna u law, an hremtu hna kha thla va campiak hna u ( Matthai 5:44).” Ral va dawt le kanmah hremtu/harnak petu caah thlacam cu thil har tuk asinain zumtu hna nih kan tuah dingmi le kan i nun pi ding a si.

Caan tampi cu minung hmai ah teitu kan si nain Pathian hmai ah a sungmi kan rak si theu. Zumtu cu minung hmai ah teitu co a duhtu si loin Pathian hmai ah teitu si hi a si. Remnak ser duh ahcun ka palh lomi zong palh ti a hauh caan a um i, kan palh lo mi cung zong ah mi ngaithiam kho mi si herh caan a um. Minung lei kap cun thil har ngai asinain Pathian nih a kan duh piak mi cu remnak a um khawh nakhnga ding caah hramthawktu si hi a si.

Jesuh cu vailam an tah lai ah Pilot hmaiah an chuah pi lioah khan, Pilot hmai ah a au cuahmah mi Isreal mi hna kha teitu an rak lo nain Pathian hmai ahcun dai tein a rak um mi Jesuh tu kha teitu a rak si .

Remhnak ser tikah a herh bak mi cu: Mah lei kap in thlen a hau mi/nun tthinh awk a um mi thlen le tthinh hmasa hi a herh bak mi a si. Remnak ser duh ttung i mah lei kap in nun i remh hmasa loin remhnak ser hi Pathian Bia nih a kan cawnpiak mi a si lo. Mah lei kap in thlen a hau mi/nun thinh awk a um mi thlen le tthinh hmasa hnu ah remnak ser hi Pathian nih a kan duh piak mi a si.

1 Samuel Dal 21-26 chungah kan hmuhmi cu Sawl siangpahrang nih David cu thah ding ah a dawinak le  David nih Sawl siangpahrang cu lehrulhnak le teirul chapnak in si loin remnak he zawnruahnak he a chonhbiak lengmang ti kan hmuh. Sawl siangpahrawng nih remhnak ser duh phun in aa chonhbiak ter nain a nunnak ah remh a hau mi a remh bal lo. Ngaihthiam a hal nain a mah nih David cu ngaithiam lo in thah ding ah a dawi lengmang ti kan hmuh. Remhnak ser tikah a herhmi cu mah palhnak le remh a hau mi i remh hmasa kan hau. Nangmah na remh hmasa lo, na thlen hmasa lo ahcun remnak sertu si ding cu a hlat tuk.

Matthai 7:5 “ na mit chung um mi thingtan kha i chuah hmasa law pei na unau mithnawm cu fiangte in na hmuh lai i na coih piak khawh lai cu” ti kan hmuh.

Vawlei ralpi pahnih hnu ah hruaitu pawl nih an rak i ceihmi cu Nuclear tuah khamnak kong a si. Nuclear nih kan vawlei a hrawh dih lai tiah an rak phan caah Nuclear hi tuah si ti hlah seh tiah bia an rak chah. Nuclear nih harnak faktuk a kan pek tiah an rak ti. Kan nunnak ah remnak a um khawh venak hnga ding caah cun huatnak nuclear, lungfahnak, teirul cham duhnak lungthin vialte kan hlonh dih hmasa a hau.

Amor nih Absalom i a farnu Tamar cu a ih pi caah Absalom cu Amor cung ah a lung a fah tuk caah a thah. A pa David siangpahrang inn a chuah tak i a pa tiang a doh. David siangpahrang cu Pathian fa a si caah a fapa Absalom nih a doh len ko nain a fapa cung ah harnak, a ralkap hna nih an pek hnga lo ding caah bia tha tein a chimh hna. David nih cun remnak ser duhnak lungthin a ngei peng. A fapa Absalom belte cu remnak ser hrimhrim aa tim lo. Remnak sertu ah auhmi kan si bantukin Pathian fale hna nih cun huatnak, lungfahnak, teirul cham duhnak lungthin vialte kan hloh a hau.

Cun, Pathian fale hna sinah remnak ser duhnak he an rat tikah Pathian fale hna i kan tuanvo cu remhnak ser duhnak mithmai chit hi kan rian a si ve. Pathian fale tiah auhmi cu remhnak a sertu an si. Kan vawlei ah Remnak le daihnak a chuah khawhnak hnga ding caah tuanvo pek mi kan si. Remnak le daihnak cu kanmah fimnak le thiamnak nih cun kan chuah pi kho lai lo nain remhnak le daihnak a um khawh nakhnga hramthawktu kan si lai i Pathian nih a tangmi cu pehzulh in a kan tuanpi ko lai.

Pathian fale tiah auhmi hna nih cun bia an tuah hna lo. Remnak lam tu an kawl. Pathian fale hna tiah auhmi hna nih cun buainak le tthennak chuah pi lo in remnak tu an kawl. Pathian fale hna tiah auhmi hna nih cun siknak lam an kawl lo. Remnak tu an kawl. Nangmah le keimah ruang ah kan hawile hna an i si sual maw? Nangmah le keimah ruang ah innchugkhar hna a buai sual maw? Nangmah le keimah ruangah innchungkhar le khrihfabu hna aa then sual maw?

Pathian fale cu remnak a chuahpitu kan si. “Mi le mi karlak ah remnak a sertu cu thluachuahmi nan va si dah! Pathian nih ka fa tiah an ti hna lai.”

Bawipa nih a Bia thluachuahnak  kan pek piak ko seh.