“Pathian duhnak tuah kha nan duhnak ngan bik i a chiami cu lunglawmmi nan va si dah! Pathian nih nan duhnak cu a tlinter lai.” Matt. 5:6

Pathian duhnak tuah kha nan duhnak ngan bik i a chiami cu a timi hi zeitindah a sullam na lak? Duhnak ngan bik ah chiah timi cu hi thil hi kan nunnak ah a biapi tuk, ka tuahlo ahcun a si kho hrimhrim lo, zeidang thil ka tuah hlan ah ka tuah hmasa a herh tiah thinlung ah i chiah khi a si.

Dinnak kha rawltam tihal bangin a duhmi cu lunglawmmi nan va si dah! zeitintiah nan khim lai (King James version). Mi zeihmanh nih Ti le rawl hi kan nunnak caah a biapi ah kan chiah, kan ruah i kan kawl hmasa tawn bangin Pathian duhnak tuah kha a biapi ah a chia mi, a ruat mi, a kawl hmasa mi cu lunglawmmi nan si. Pathian nih na duhmi le nan ruahmi cu an pek hna lai ti cawnpiaknak a si.

Minung hna nih hin khuazei ahdah lunglawmhnak le lungsinak hi an kawl, an hmu taktak maw timi ruat tti tuah hna u sih. A tlangpi in Phaisa (rumnak) ah, Nawl ngeihnak ah, Min thannak, Pumsa nuamhnak (Zu le Nupa caan hman ttinak) ah an kawl nain lungsinak taktak an hmu kho lo. Solomon Sph nih vawlei Lunglawmnak hi biatak tein a rak kawl. A fimnak in, a nawl ngeihnak in, a chawva in a rak kawl nain a hmu lo. Hi lunglawmh nak ca i ka tuahmi vialte hi pakpalawng an si dih, lomhnak taktak an ka pe kho lo a ti.

Cucaah Lunglawmhnak taktak cu khuazei ahdah kan kawl lai timi cu ruah a hau. Minung thinlung theitu Jesuh nih minung hna nih hin an duh cio mi le an kawl cio mi cu Lunglawmnak le Lungsinak a si ti a hngalh. Cun, anmah duhnak le ruahnak in an kawl ahcun Lunglawmnak taktak an hmu kho lai lo ti zong a hngalh caah “Lunglawmnak Taktak” tiah tlangtar in peh thliahmah tein lunglawmhnak hmuhnak kong phun 9 a chim (Matt 5:3-12).

Jesuh Khrih nih a chim mi lunglawmhnak hi Greek holh in makarios an ti.  Greek mi hna nih tthatnak le lunglawmhnak an tawn tikah kan Pathian nih a kan tuahpiak; mithmai ttha a kan pek an ti i zumh le ruahphak khawh lo tiang in a cang mi lunglawmhnak an ngei tawn.  Bible thiamsang hna nih Jesuh nih Pathian nih minung sinah a pek dingmi lunglawmhnak kong a chim tikah Greek biafang makarios hi a hman an ti. Jesuh Khrih nh a chimmi lunglawmhnak cu hi vawlei fimnak, nawl ngeihnak le chawva nih a chuahpi mi lunglawmhnak nakin a thuk deuh an ti.

Jesuh nih a chimmi lunglawmhnak ahhin lungsinak, lungtlinnak, lung thanuamnak, lung siaremnak, lung diriamhnak le lunghmuinak hna aa telh chih. Hi lawmhnak cu Pathian sin lawnglawng in kan hmuh khawh dingmi asi.  Pathian he pehtlaihnak tha ngeih peng ahcun hi lunglawmhnak hi ngeih peng khawh a si.  Hi vawlei ah kan sinah Pathian Pennak cu Jesuh Khrih thawng in a tlun ruang ah kan ngeih khawh mi lunglawmhnak asi.  Hi lunglawmhnak cu “vancung pennak lunglawmhnak nun” a si.

Cawnpiak a thiam tukmi Jesuh Khrih nih Pathian duhnak tuah kha rawltam tihal bangin a duhmi cu lunglawmmi nan va si dah .. nan khim lai a ti. Nifatin zing le zan i kan herhmi Ti le rawl hmang in Pathian kong kha a kan cawnpiak.

Jesuh nih khuazei in dah ka ei awk ka kawl cu ka hmuh lai, ka din awk cu ka hmuh lai, ka hnipuan cu ka hmuh lai tiah lungrethei in a ummi hna kha a hmuh hna tikah Pathian Pennak le zeidah tuah hna seh ti a kan duh timi kha biapi deuh in ruat u law thil dang vailte hna zong hi an pek thiamthiam ko hna lai tiah a cawnpiak hna (Matt 6:31-33).

Hi cawnpiaknak pahnih nih a kan chimhmi cu, vawlei thil ngeih kan i timh hlan ah a ngeitu Pathian ngeih hmasa a si. Ti le rawl kan kawl hlan ah Petu Pathian duhnak tuah hmasa a si. Pathian duhnak tuah kha Rawltam tihal bangin a duhmi cu Lunglawmmi nan si, Pathian nih nan duhmi kha a tlinter lai a ti

Pathian duhnak tuah cu zeidah a si? Pathian duhnak tuah cu zei dang thil vialte nakin thil vialte Petu Amah theih hmasa a si. Zeidang kong vialte nakin Pathian kha a biapi bik ah chiah hmasa a si. Amah kong ruah le thangthat hmasa a si.

Pathian duhnak tuah cu Ti le rawl kan hlam bangin Pathian hlam nun a si. Salm ttialtu nih Sazuk nih rial tidai a ngaih bantukin Maw Pathian nangmah cu kan ngai. Maw a nungmi Pathian, nangmah cu tihal in kan hal; zeitik ah dah na umnak ah ka hun khawh lai i kan biak khawh lai? a ti (Salm 42:1-2). Bawipa dawtmi hna, Pathian hlam hna u sih. Bawipa kan ngai ti hna u sih. Nifatin Ti le rawl kan hlam bangin Nifatin in Pathian hlam hna u sih. Kan cungah Pathian aa lawm lai i kan duhmi a tlingter lai. Lunglawmnak taktak kan ngei lai.

Salm ttialtu nih Pathian cu Ti le rawl hlam bangin a hlam caah Pathian nih hnangamnak a pek i Pathian cu kan i dornak le kan thazang a si, harnak caan ah a kan bawm zungzaltu a si. Cucaah cun vawlei cu i hnin in tlang ci rili chungah tla hna hmanh sehlaw ka thin a phang lai lo a ti (Salm 46).

Pathian duhnak tuah cu Amah thangthat ngaih a si. Lianngan Bik Bawipa, zeitluk in dah na biakinn cu ka duh, Biakinn tual cu ka ngai, a ti.  Na biakinn chungah a ummi cu zeitluk in dah an i lawmh, nangmah thangthatnak hla a sa zungzalmi hna cu zeitluk in dah an tha a nuam, a ti (Salm 84:1-2). Bawipa dawtmi, Bawipa thangthat na ngai maw? Biakinn na ngai maw? Amah cu thangthat hmasa law Pathian nih nan duhnak a tlingter lai.

Bawipa dawtmi, nangmah khuakhannak in Ti le rawl na kawl hlan ah Pathian duhnak tuah hmasa i zuam. Salm ttialtu nih Chiandeih hmanh hi rawl hmu loin an um tawn i rawltam in an vak tawn. Sihmanhsehlaw Bawipa nawl a zulmi cu zeihmanh an baumi a um bal lo, a ti (Salm 34:10).

Maw Pathian, nangmah cu ka Pathian na si, nangmah cu kan ngai. Ka nunnak nih hin an hlam i ka thlarau nih tihal in an hal; vawlei ro nih ti a duh bantuk khin an duh tiah Pathian au tuah. Lunglawmnak na hmu lai (Salm 63:1).

Hawi dawt, zeitindah lunglawmhnak na rak kawl? Na hmuhmi ah naa lomhnak a tling maw? Bawipa duhnak tuah hmasa hna u sih law Bawipa nih kan duhmi a tlingter lai.