MIDANG CUNGAH ZAANGFAHNAK NGEIH

“Mi dang cungah zangfahnak a ngeimi cu lunglawmmi nan va si dah! Pathian nih an zangfah hna lai.”

Matt.5:7

Biahmaithi

Tlangcung cawnpiaknak hi pahnih in ṭhen khawh a si. Pakhatnak in pathumnak tiang nih zeitindah misualmi hna nih Sertu Pathian hmai ah kan dir ning ding a si ti kha a kan cawn piak. Pakhatnak ah, Thlarau ah mi chambau nan si kha i hngal zungzal u. Pahnihnak ah, nan sualnak ruangah khan ṭap ulaw, sual ngeihchihnak he Pathian kha kawl u. Pathumnak ah, Pathian hmai ah hin tangdor tein nung ko u tiah a kan cawnpiak. A palinak tu ah cun, cu bantukin Pathian hmai ah a rami hna cu Pathian nih dinnak kan pek hna lai tiah bia a kan kamh. Panganak in a cung lei ahcun Pathian he kan i pehtleihnak si ti loin amah Pathian sinin kan hmuh mi Khamhnak Vel, zangfahnak le dawtnak, lunglawmhnak  hna kha kanmah le kan minung hawi he kan ipehtlaihnak ah kan hman dingmi nun ziaza tu kha a kan chimh mi an si.

Matt.5:7 “Mi dang cungah zangfahnak a ngeimi cu lunglawmmi nan va si dah! Pathian nih an zangfah hna lai.” Hi cacang kan rel tikah hin kanmah tuahsernak in kan hmuh mi khi a lo, a sinain cu cu a si lo. Pathian nih a kan pekmi zangfahnak, vel le dawtnak hna kha midang cung i kan hman ṭhan ve tikah Pathian thluachuahnak a tingcotu nan si lai tinak tu a si deuh.

Zangfahnak Hrampi

Pathian nih a lawmhmi le thluachuah a pekmi zangfahnak cu Amah Pathian chung lila ah a um mi a si. Pathian zangfahnak cu tihal le rawlṭam in a kawlmi hna le thlarau ah mi tangdormi hna cung ah a phan tawn. Zangfahnak cu zangfahnak chung lila in a rami a si bantukin nangmah le keimah nih kan ngeihmi zangfahnak a hrampi cu kan Pathian sinin a rami a si. Efesa 2:4-5 “Sihmanhsehlaw Pathian nih a kan zangfahnak cu a tamtuk i a kan dawtnak cu a ngantuk hringhren  caah a nawl  kan ngaih lo ruang i thlarau lei i kan thih ko lioah khan Khrih sinah cun a kan nunter. Khamh nan sinak cu Pathian vel thawng in a si.”  Kan iruahpalh lo dingah chim ka duhmi cu, ZANGFAHNAK LE VELNGEIHNAK hi a si. Zangfahnak kan timi cu Pathian nih kan co awk a simi dantatnak kha a zangfahnak ruang ah a kan coter lo i a kan pe lo. Amahtu nih kan in dingmi dantatnak kha aa lak. Cucu ZANGFAHNAk (MERCY) cu a si. Cu bantuk ṭhiamṭhiam in Velngeihnak zong cu a si. Hmuh awk kan itlak hrimhrim lomi zungzal nunnak kha Pathian nih a kan pek. Kan fel ruang zongah a si lo, kan din ruang le kan thiantuk ruang zongah si loin Pathian nih a kan dawtnak ruangah Khrih chung in kan hmuhmi zungzal nunnak cu a vel thawng lawng lawng in a si. Cucaah kanmah nih midang cungah zangfahnak kan ngeih ruangah Pathian zangfahnak kha kan co siloin Pathian sinin kan hmuhmi le kan chungah a chiahmi a zangfahnak liannganmi tu kha midang sin i kan hman ṭhan ve tikah Pathian dinnak le thluachuahnak kha kan co deuh mi a rak si. Zangfahnak taktak cu Pathian chungah aa bunhmi tu a rak si.

Zangfahnak kan timi cu zeidah a si kun?

Zangfahnak cu Pathian ziaza le lungput a si caah Jesuh Khrih thlarau nih a tawnghmi hna nih Khrih nun ziaza chungah an nunnak kha aa thlen ning ding le kan tuah awk a si mi rian kong kha a kan cawn piak (Matthai 5:7). Cucaah Zangfahnak timi cu HRAM a ngeimi a si bantukin Bia ceihtu pa i a nunnak le lungput chungah a um mi a si.  David nih Psalm 7:11 ah “Pathian cu a dingmi Biaceihtu a si, miṭhalo kha sual a phawt zungzal hna” tial a ṭial. Asinain i ralkah ngai in Titus 3:4 ah Paul nih, “Sihmanhsehlaw kan Khamhtu Pathian dawtnak le zangfahnak cu vawlei cungah a hung langh tikah, thil ṭha kan tuahmi ruangah siloin, amah nih a kan zangfah ca lawnglawng ah kan nih cu a kan khamh…” tiah a ti. Dinnak in bia a ceih i sualnak a huatu pa nih kan cungah a bia khiahnak cu Psalm 103:8-11,17 ah hitihin a langhter ṭhan;

Bawipa cu zangfahnak le dawtnak in a khat, Mawhchiat chih lengmang kha a hmang lo

Hmuh awk kan itlak ningin dan a kan tat lo, Kan sualnak le ṭhat lonak kan tuahmi ning zongin a kan lehruk lo.Van cu vawlei nakin a san deuh ngaingai bantukin a dawtnak cu amah a ṭihmi hna caah cun a ngan ve

Nichuahlei le Nitlaklei an hlat tluk khin kan sualnak cu kanmah he aa hlat ah a kan ṭhial piak.

Amah he a kan remter Ṭitus 3:7 ruahchannak a ngei lomi kha ruahchannak a pek hna.

Zungzal nunnak a kan pek Psalm 103.17

Phungthlukbia16:6 ah, “Zangfahnak le Biatak in kan sualnak cu ngaihthiam kan si. Cun Bawipa a ṭih mi cu   ṭhatlonak nih an tlunhnawh lai lo.” (NKJV) Pathian zangfahnak le velngeihnak thawngin kan nih cu sual ngaithiamnak coter kan si lawng siloin vawlei nih a chuahpimi ṭhatlonak chungah daihnak thluachauh zong pek chih kan si, Amen. Khrih chungah mitling ah ser kan si bantukin nangmah le keimah hmangin mi dang sinah zangfahnak langhter kha fial kan si. John.20:21

Zangfahnak cu Rian a ṭuanmi a si.

Jesuh Khrih chungin a chuakmi zangfahnak le ngaihthiamnak cu midang sinah phanhter ve kha zumtu hna i kan ziaza a si awk a si ti kha Matt 5:7 ahhin a kan chimh mi cu a si.

Jesuh cu ngunkhuai khawltu hna le misual tampi nih khan Matthai inn ah zaanriah an dum pi, cu lioah cun Pharasee mi nih khan a zultu pawl cu a ziah nan saya pa nih hin mah hna pawl hi rawl a dum pi hna tiah an hal. Jesuh nih a thawh hna i, a dammi nih cun sibawi an herh lo, a zawmi lawng nih khan an herh. Va kal ulaw, ‘saram thawinak si loin ka duhmi cu zangfahnak lungthin kha a si’, tiah a ti hna.

“Phungbia cawnpiaktu le Farasi mi hna, nan caah ngaihchia a va si dah! Mi depde hna! Tihang tamhnak puṭinan tehna, hamhhuai te hna, aithing te hna hmanh kha cheuhra ah cheu khat Pathian sinah nan pek, sihmanhsehlaw nawlbia nih biapi taktak a si a timi ‘dinnak le mi zangfahnak le zumhawktlakmi sinak’ hna cu zeihmanh ah nan rel ṭung lo, hi hna hi pei nan tuah awk a si cu, a dang zong kha daithlanh hlei loin.” tiah a ṭial. Matt 23: 23-24

Pathian nih biapi ah a chiahmi cu: Pathian nih a mi hna cu, a lenglei in hmuhmi nunnak nakin thinlung chung in a chuakmi dinnak le zangfahnak he Nun hi a kan duh. Amah cungah dawtnak ngeih i, midang cungah zangfahnak ngeihter a kan duhtu Pathian a si. Biaknak rianṭuanmi sawhsawhmi le a min Khrihfa sawhsawh si hi a kan duhpiak mi a si bel lo. Biaknak taktak a ngeimi Samaria miṭha pa bantuk si hi a kan duh piak mi a si.

Samaria miṭha pa thinlung put (Luke 10:25-37)

Kan Pathian cu Samaria miṭha pa thinlung le lungput hi ngeihter a kan duh tu a si

  1. Amah a hmuh tikah a zang a fak ngai ngai

2.A thinlung chungin a chuakmi zangfahnak nih bawmhduhnak a ngeih ter

  1. An velhmi pa cu a ṭum hnawh i a zohkhenh. A hma ah chiti le mitsur hang kha a thuh hna i a men hna; cun mipa cu a satil cungah khan a chuan i khual riahnak inn pakhat ah a kalpi i cuka ahcun a zohkhenh. (Vs.34)
  2. Zangfahnak thinlung nih nang cu ka ral na si tinak thinlung a ngei lo. Luke 6:36 ah, “Nan pa cu mi zangfah thiam a si bantukin nannih zong mi zangfah thiammi si ve u, tiah a ti.”

“Pakhat le pakhat lungsi lonak nan i ngeih tikah pakhat le pakhat i ngaithiam u law i bawm u. Bawipa nih an ngaihthiam hna bantukin pakhat le pakhat nan i ngaithiam lai.” Kolose 3:13

“pakhat le pakhat cungah zangfahnak lungthin le nemnak lungthin ngei ulaw Pathian nih Khrih chungin an ngaihthiam hna bantukin pakhat le pakhat i ngaithiam u.” Efesa 4:32

A cunglei bible cacang nih a kan cawnpiakmi cu lung dongmi hna sinah zangfahnak mit ngei i an tuarnak kha hngalhpiak thiam  hna ulaw, kan ral an si ko nain bawmh duhnak thinlung le zawnruahnak thinlung ngei u; cucu zangfahnak kan timi cu a asi i Pathian nih Khrih nunnak hmang in kan sinah a langhter bantukin kan nih a fale  a simi hna zong  nih kan ziaza a si awk a si. Cu ti na tuah ahcun Pathian thinlung chungah thluachuak mi nan si lai i vawlei ah lawmhnak le daihnak thinlung thluachuahnak a cotu nan si lai. Amen.