JESUH ZULTU

“Nannih cu ka zultu nan si ruangah mi nih an in nihsawh hna i an in hrem hna i lih a phunphun in an in puh hna tikah, nan caah lunglawmh awk a va si dah! Nan lung i lawm u law nan thanuam ko u, zeicahtiah vancung khua ah laksawng tampi chiahpiak nan si ko. Cu bantuk cun pei nan hlan i a rak ummi profet hna kha an rak hrem hna cu,” tiah a ti.”

Matt 5:11-12

 

Tutan kan cawn dingmi cu “Zultu” si ruangah tuarin ding le tuarinnak pin ah lawm man hmuhnak kong a si.

 

Jesuh nih Amah zulh a duhmi hna caah Ri a sermi cu Ahohmanh nih zulh nan ka duh ahcun mah zawnruahnak kha nan ngol lai i nifa tein nan vailam kha nan i put lai i nan ka zulh lai (Luke 9:23).

Ahohmanh a nu siseh, a pa siseh, a fapa siseh, a fanu siseh, keimah nakin a daw deuhmi cu ka mi si awk aa tlak lo. Ahohmanh a vailam tahnak kha aa put i ka hnu in a ka zul lomi cu ka mi si awk aa tlak lo (Matt 10:37-38).

 

Zultu ziaza ding, Zultu nun can ding Jesuh nih a fiantermi cu 1. mah zawnruahnak kha ngol a si. 2. Nifa tein a vailamtahnak put i Jesuh zulh a si. Vailamtahnak put timi nih a kan cawnpiakmi cu;

  • Vailamtah cu tuarinnak a si. Mi nih nihsawhnak, lih a phunphun puhnak, hremnak
  • Vailamtah cu aa kalhmi mi a si. Minung ruahnak kha Pathian bia nih a hun kalh.
  • Vailamtah cu Khamhnak le Roconak a si.

 

Nannih cu ka zultu nan si ruangah mi nih an in nihsawh hna i an in hrem hna i lih a phunphun an in puh hna tikah, nan caah lunglawmh awk a va si dah tiah Jesuh nih a ti. Amah hrimhrim zong kha khamhnak lampi a zulh lioah mi nih an nihsawh, an hrem, lih a phunphun an puh. Sihmanhsehlaw, cuka ahcun a tuanbia a dong lo, vancung ah Pathian Orhleikam ah a tthu i vancung le vawlei cung i a ummi nawl ngeihnak vialte cu pek a si. Cucaah Jesuh nih keimah ruangah mi nih an in nihsawh hna i an in hrem hna le lih a phunphun in an in puh hna tikah lunglawmmi nan va si dah! vancung khua ah laksawng tampi chiah piak nan si a timi hi a thinlung in a ruahmi a si lo, mi nih an chimmi a kan chimh chin mi zong a si fawn lo, Amah hrimhrim nih a hmuhton mi a si.

 

Nihsawh: Keimah ruangah mi nih an in nihsawh ahcun na caah lunglawmh awk a si ti khi a si. Thangthatnak hla thinlung tak in na sak lioah nihsawh na tong men lai, pumhnak na kal ruang le thla na cam ruangah a piangthar ko ee, kan zoh tuah lai cu tiah nihsawh na ton man lai. Sihmanhsehlaw, kan thangthatmi Jesuh nih keimah nih ka theih ko, keimah nih ka hmuh ko caah na caah lunglawmh awk a si ee ti cawnpiaknak a si. Lih a phunphun in an in puh tikah, nan caah lunglawmh awk a va si dah! keimah nih a hmanmi ka hngalh ko ti khi a si.

 

Nifa tein na vailamtahnak kha i put law ka zul u a timi cu mi nih an kan nihsawh tikah, lih a phunphun an kan puh tikah kan minung sinak in kan leh ve sual nakhnga lo vailamtah nih ngaithiam hna tiah kan ruahnak kha a hun kalh.

Cu bantuk cun pei nan hlan i a rak ummi profet hna kha an rak hrem hna cu. Profet hna cu Pathian bia phuangtu an si caah sualnak le thatlonak a tuahtu nih an huat hna, nawl ngeitu nih an tlaih hna, an hrem hna, thong ah an thlak hna, an thahmi zong an um. Sihmanhsehlaw, Pathian ruangah an tuarin mi cu a lak a si lo, vancung ah Pathian nih laksawng a chiah piak hna. Vawlei an nun lioah tuarin khawhnak nun a pek hna.

Stephen: Lamkaltu Dal 7 chungah Steven lung in an chehnak kong kan hmuh. Nawl ngeitu hmaiah an chuahpi i lung cheh ding a si cang. Asinain, a zulhmi Pathian nih a umpi i a tuar dingmi harnak le an chehnak ding lung kha zoh loin van lei a zoh ter i Pathian orhlei kam ah a dir mi Mi Fapa tu a hmuh. Stephen nih mi zapi cu “Zohhmanh u, vancung aa hung i Pathian orhlei kamah Mi Fapa a dir kha ka hmuh,” tiah a ti (Lamkaltu 7:56). Jesuh nih keimah nan ka zulh ruangah mi nihsawhnak, hremnak a ing mi cu nan caah lunglawmh awk a va si dah vancung khua ah laksawng tampi chiahpiak nan si a timi cu Steven nih vawlei a um lioah a co dingmi a hmuh.

Moses: Moses cu Pathian nih Israel miphun hruaitu ah a auh mi a si nain a lam a tluang thluahmah lo. Pathian ruangah Faro nih harnak tampi a pek, a hruaimi hna nih lungre theihnak an peknak kan hmuh.

Profet Elijah: Pathian nih a bia phuantu ding ah a auh. Pathian ruangah harnak tampi a in. Ahad Sph nih profet hna cu Karmel Tlang ah a pumh hna i mipi hmai ah challenge a tuah hna. Baal maw nan zulh lai, Pathian dah nan zulh a ti hna. (1 Sph 19:1-4) Elijah cu Ahad nih that a timh caah a zam ti kan hmuh.

Moses le Elijah cu Pathian nih a auh hna nain mi nihsawhnak, tuarinnak le a nunnak caah ttih a nungmi dirhmun tiang an phan. Sihmanhsehlaw Cuka ahcun an tuanbia a dong lo. Jesuh muihmai aa thleng lioah Moses le Elijah cu Jesuh he bia an i ruah (Matt 17:3). Jesuh nih keimah ruangah a tuarmi cu nan caah lunglawmh awk a va si dah a timi Moses le Elijah cung ah a tling.

Pathian zumh ruangah, Jesuh zulh ruangah nihsawh a tongmi hna, harnak a tongmi hna, hremnak a tongmi kan Pi/pu hna nun tlawmpal kan zoh tuah lai.

 

Hakha Tipil Khrihfabu tuanbia kan rel. Zumtu mihmasa, Sang Ling cu Khrihfa i a luh ruangah a unau nih, “michia lawng pei Khrihfa ah an lut ko cu” tiah biafak ngaiin an rak ti (P-v). Cun, Hakha peng i Khrihfa hmasa bik Shia Khaw kong Carson siangbawinu nih hi ti hin a ttail. Shia Khaw cu Tipil a in ah kum 15 hrawng a si. Ngakchia fim ngai a si i a fel zong a fel ngai. Jesuh Khrih caah tehte si kha zeitik caan paoh ah aa tim zungzal. Asinain khuachung i a kal tikah mi nih khan cil an chak i an zomhtaih, an serhsat ngaingai tiah a ti (P-64).

 

TABC Khrihfabu tuanbia: 1910 kum ah Pu Van Ceu, Pu Chan Kian le Pu Tei Dun hna cu Dr. East nih tipil a pek hna i anmah 3 hi zumtu hmasa cu an si. (P-292).

 

Sopum khua Khrihfa hmasa hna cu mi tlawmte le sifak santlailo deuh an rak si hna caah Lawki pawl nih an rak nehsawh ngai hna. An i pumh lio thengte ah an pumhnak i rawk seh tiah hnahnawhnak an rak pek hna, khuachia rual an i pum cang khih tiah hna an hnawh tawn hna. (P-175, 2nd para)

 

Farrawn khua Khrihfa hmasa pawl zong serhsatnak le nih sawhnak an rak ing ngai ve. Lo an kal tikah a bu tein an kal tti tawn hna i zumlotu pawl nih tlaipi ah chuncaw an ei pi tawn hna. An ti a hal cang lai, an rawl a tam cang lai ti caan paoh ah zuhui an eihnawh hna. Sirsen dong le armitdong an ttawh hna i nan Pathian rawl cu ei uh tiah an cheh hnawh hna. Serhsatnak tampi an ing ko nain Pathian nih lam a hruai hna i caan raulo te ah member 40 an hung phan. 1928 kum ah Pu Hniar Vung hruainak thawngin Biakinn pe 15 x12 an sak (P-279, 4th Para).

 

Hriphi khua Pathian riantuantu hmasa Rev Heng Cin kong. Pathian kong chim kha a rawl thaw bik a si, ruahpi sur le lam a nalmi nih a dawn bal lo tiah a tuahbia an tial. Voi khat cu khua bawipa nih an khua chungah luhnak nawl a pek lo caah zan khuadei ruah sur lakah ram tang ah a riak. (Amah nih harnak a tonmi a tufa hna a chimhmi hna). Pathian ruangah serhsatnak le nganfahnak a tuarmi cu Pathian nih a hmuh dih. Pathian nih a cawisan i Rev Heng Cin le Pu Mang Dun nih an ruah, an khanmi cu Hriphi khuami caah cun phungbia bantukin a fek i, cu nih cun khua le ram a hruai thathnemnak tampi a chuahpi. (P-67, 2nd Para).

 

Zumtu mi hmasa hna tuarinnak thluachuah cu kan nih an tufa hna cungah a lang. kan khua, kan peng chungah a lang. Catang sang phanmi tampi kan um, chawva tampi ngeimi kan um, vawleicung ram khuazakip kan phan kho. A sungbik cu Khrih a biami miphun kan si le kan ram khrihfa ram a si hi a si.

 

Nihin ni ah hi dirhmun kan phanh khawhnak, Pathian a biami miphun kan si khawhnak cu Pathian dawtnak le zumtu mi hmasa hna tuarin khawhnak ruangah a si. Miphun dang hna le nunphung dang hna lakah khua kan sa hna hih. Biakinn a phanmi Khrihfa zumhawltlak kan si khawh nakhnga nifa tein kan vailamtahnak i put hna u sih.