Men are lunatics, women are Nuts timi cauk tialtu nih a tialmi chungah ah nikhat ah “ nu nih biafang 5000 an chim, pa nih biafang 2000 kan chim. Men pare pigs, fortunately women like pork timi cauk tialtu  nih a langhternak ah nikhat ah “ nu nih biafang 10,000 –20,000 karlak an chim, pa nih biafang 2000-3000 karlak kan chim. Nikhat ah a tlawmbik nu nih biafang 5000 le pa nih 2000 kan chim timi cu el awk a tha lo mi a si. 

Bawipa vel le dawtnak thawngin kan hmuh ballo mi ni sunglawi kan phan kho than. Hi ni sunglawi ah Bawipa nih kan lei hi ralring tein hman hna seh ti a kan duh( Jeim Dal 3). Baibla chung ah lei kong hi cang (verse) 126 leng chung ah hmuh khawh a si. Avoi in ( 129) leng hmuh khawh a si.  

Kan lei ah thluachuahnak le chiatsernak, tha thawhternak le thachiat ternak ,nuamh ternak le ngaihchiat ternak,mi lungthawn ternak le mi lungder ternak,mi panhternak le hmaichiat ternnak,rem ternak le then ternak,dawt ternak le huat ternnak, thih khawhnak thawnnak le nunh khawhnak thawnnak ( Phungthlukbia 18:21) hna an um.  

Hi vialte hi nangmah le keimah lei ah a um mi an si caah nihin kan riantuannak le kan thutdirnak le kan khuasaknak ah kan hmurka chungin thluachuahnak, tha thawhternak, nuamh ternak, mi lung thawnternak, mi panh ternak, rem ternak, dawt ternak a chuah tertu LEI hmang hna u sih tiah hi thawngtha hin kan sawm hna.  

Efesa 4: 29, “ Bia nan i ruah tikah mi ca thatlonak bia hmang hlah u. Mi ca i san a tlaimi, a herhmi zawn i thatnak a chuahpitu le a thei mi thluachuah vanluh a petu ding bia lawng kha hmang u.”  

Nihin kan chim mi bia hi zanlei ah kan ngaihter than hna sehlaw, lunghmui awk a tlak mi bia maw an si hnga? Asiloah ngaihchih awk  bia pawl dah an si hnga????