“Nan ka hal i ka sinah thla nan cam ahcun nan bia kan ngaih piak hna lai. “

Jeremiah 29:12

Babylon siangpahrang Nebuchadnezzar nih Judah mi hna le Jerusalem upa hna cu sal caah a tlaih hna i a ram ah a kalpi hna. Sal i tlaihmi hna le ramdang ah kalpi mi hna cu an thinlung a zaw lai i an lungre a thei hringhran ko lai. An khuasak tintuknak caah an awklok a chawng ko lai. An kal taakmi ram kong an ruah ah ngaihchia ngaingai in an um ko lai.

Cu bantukin harnak a tong i lung rethei, ngaihchia ngai in a ummi hna sin ah profet Jeremiah nih ca a kuat hna.

“Sal nan taannak khuapi kha a ṭhatnak ding kawl cio u law, kha khua caah khan Bawipa sinah thla cam cio ko u; zeicahtiah a ṭhat ahcun nannih zong ṭhatnak nan hmu ve lai,” tiah ca a kuat hna (Jer. 29:7). Tu bantukin sal ah nan taang peng lai lo, nikhat khat cu Bawipa nih luatnak an pek ko hna lai tiah thazaang peknak ca a kuat hna.

Bawipa nih, nan ca i ka tinh mi cu keimah lawnglawng nih ka hngalh. Cucu vanchiatnak si lo in thluachuahnak a si lai a ti hna (Jer. 29:11).

Ramdang ah sal an taan lio caan ah Bawipa bia cu, nan sining ka theih in kan hmuh ko hna. Nan caah tinhmi ka ngei ko. Tu lio nan dirhmun cu vanchiatnak ah nan ruah ko hnga, sihmanhselaw nan caah tinhmi ka ngeih mi cu thluachuahnak a si a ti.

Nan harnak chung in ka au u law kan leh hna lai. Nan ka hal i ka sinah thla nan cam ahcun nan bia kan ngaih piak hna lai tiah Bawipa Pathian nih a kan ti. Fale nih nulepa sinah kan thinlung dihlak in thil kan hal hna tikah cawlcang lo in an um khawh lo bantukin Pathian sinah thinlung dihlak in thla kan cam tikah Pathian a um sawh kho lo. Nangmah le keimah thlacamnak hi Pathian ṭhu kho lo in a tuah tu a si.

Kan tonmi thil ruangah hnabei dong in um hrimhrim hna hlah usih. Kan caah a ṭhabik in khuakhang i thluachuahnak lam a kan ser piak zungzal tu Pathian sinah thla cam ko hna usih.

Pathian daihnak nan dihlak cungah um ko seh.