PATHIAN NIH A HNGALH DIH

Midang nih kan sining taktak a kan theih le hngalh lai cu kan duh lo. Zeicahtiah tlinlonak le chanbaunak kan ngeih caah a si ko. Midang nih theih/hngalh lai phan mi thuhmi zia kan ngei cio ko. Midang nih hmuh lo nak ah kan tuahmi thil ṭhalo zong kan thuh ko hnga, kanmah le kanmah zong hi bantuk ruahnak le lungput ka ngeih hi cu a poi tuk kan ti mi zong a um ko hnga. Cuti kan thuh le theih/hngalh lai kan phan cu thangchiat le chimceih kan phan caah a si ko.  Minung cu kan sining taktak kan i theih tikah kan i hrial, kan i hlaw, kan i thangchiat, kan i phozaar i mual kan i phoh tawn caah a si.

David zong a nun ah diriamhnak a ngei ve hrimhrim lo. A lungput ah a lungtling lo, a tuah sermi ah a lung tling lo. Ka tlinglo ti a hngalh ko bu in thil ṭhalo a tuah mi cu a thuh ko. Midang nih an ka hmu lem lo tiin ka thuh khawh ko tiah a ruah. Midang nih theih le hngalh lai cu a ṭih.

Sihmanhsehlaw Pathian nih cun kan tuahmi siseh, kan lungput siseh, a kan theih in a kan hngalh dih hirhiar ko. Zeitluk in dah a kan hngalh ti ah cun, kan lu cungsam hmanh kha a rel dih (Matt. 10:30).

Cu tikah David nih Pathian sining cu hitihin a chim:

“Bawipa, na ka zoh dih hirhiar i na ka hngalh dih cikcek! Ka tuah mi vialte cu na hngalh dih, lamhlatpi khin ka ruahnak vialte cu na hngalh dih ko hna. Rian ka ṭuan ah siseh, ka dinh ah siseh, na ka hmuh, ka tuah mi vialte kha na hngalh dih. Ka chim hlan in ka chim ding vialte kha na hgnalh dih. Nangmah sin in khoika hmanh ah zaam nak a um lo. Khoizeika hmanh ah nangmah cu na um,” tiah tehte a khan (Salm 139:1ff).

Pathian nih kan sining tein a kan hngalh, kan tlamtlin lonak vialte a hngalh, kan sualnak vialte a hngalh, kan lungput vialte a hngalh. A kan hngalh dih ko. Sihmanhselaw kan sining tein a kan cohlan, a kan dawt, a kan zaangfah, ka fa a kan ti… Hallelujah.

Pathian nih cun ka fa a kan ti caah, kan sining tein, phuhrunak le ṭihnak pakhat hmanh um hin lo tein amah cu kan fuh ngam (I John 5:14b).

Pathian sinin kan zaam kho lo, kan i thup kho lo. Cucaah nifatin te, Bawipa cu i hngatchan ko hna usih, i bochan ko hna usih. Kan sining tein amah cu fuh zungzal ko hna usih.

Pathian daihnak nan dihlak cungah um ko seh.