No comments yet

PATHIAN BIA CU

Minung kan nunnak ah a biapi bikmi cu cawnpiaktu le fimchimtu ṭha ngeih hi a si. Fimnak le theihhngalhnak caah tangka tampi dih in khuaza ramkip ah kawl a si. Sihmanhsehlaw cawnpiaktu le fimchimtu ṭha bik cu Amah Pathian Bia hi a si.

 

Kan vawlei pi hi muihnak chungah a kal cuahmah. Minung tampi zong khuamui chungah kan lut cuahmah. Thil ṭha le thil ṭhalo zong thleidan a har ngai mi chungah khua kan sa hna.

 

Cu bantuk a fianglo mi khuamui chung khua kan sak nak ah lam a kan hmuhsaktu le lam hruaitu ngeih cu a herh hringhran. Pathian Bia lawnglawng hi lam a kan hmuhsaktu, khuamui chungin thil ṭha a kan hmuh tertu a si.

 

Cucaah Salm 119:105 chungah kan hmuhmi cu:

“Na Bia cu ka ke caah MEI-INN a si, ka lam ah CEUNAK a si.”

Khuamui chung lamkal cu a har, chuihpah lai phan a um, rianrang in kal khawh a si lo. Sihmanhsehlaw khuamui chungah MEI-INN kan ngeih a si ahcun, cu mei-inn nih cun kan kalnak ding khua fiang tein a kan hmuhter. Ralchiatnak le thinphan, chuihpah lai phannak chungin hnangamnak a kan pek. Mei-inn nih ceunak a kan pek tikah kan lam cu a tluang, rianrang in kan kal kho.

 

Kan mei-inn a si i kan lam caah ceunak a si mi Pathian Bia cu chun zan in ruat ko hna usihlaw khoizei hmun hmanh ah i ken ko hna usih. Cu nih cun lam a kan hmuhsak lai i a kan hruai zungzal lai. Kan lam a tluanter lai i harnak chungin daihnak le hnangamnak a kan pek lai.

“Hi phungbia cauk nih hin na kaa kha chuahtak hlah seh; sihmanhsehlaw a chungah aa ṭial mi vialte ningin tuah awk ah ralringte in na um nak hnga, chun zan in mah cucu na ruat lai; zeitintiah khi tikah na lam kha na tluan ter lai i khi tikah khu awng na tong lai,” Joshua 1:8