No comments yet

PATHIAN BIA CU KAN RO A SI

 

Nihin cu Pathian kong:a nawlbia, a ṭhatnak, a dawtnak, le a zangfahnak kong ruat ṭhan dingin kan sawm hna.

Pathian kong cu khoika ahdah kan hmuh tiah cun a Bia chungah a um. Cu a bia cu rel duhnak le kawl duhnak kan ngeih lo tikah Pathian ṭhatnak, dawtnak le a zangfahnak kha ruat kho lo in kan tlau tawn i kan nun cu ramcar bantukin a reu i a ro tawnnak a si. Pathian bia le a phunglam kha ruat hmasa lo in kan taksa nih a duhmi rumnak, tangka le vawlei nuamhnak kha kan kawl hmasa tikah cu i kan hmuhmi a phichuak cu nuamhnak le hlawhtlinnak siloin ngaihchiatnak phunphun tu  kha kan nun nih a ton deuh (1Timote 6:10)

Asinain Salm caṭialtu pa nih cun zei dang vialte nakin Pathian dawtnak hi ka caah cun a ṭha deuh (Salm 63:3) cucaah,  ihkhun cung i ka ih tikah zan khuadei nangmah kha kan ruat (vs.6 cf.119:148) ka nunnak cu lawmhnak rawl dangh bantukin aa dang i a khim, cucaah ka nun chung paohpaoh cu kan lawmh lai i nangmah leiah ka kut ka hler lai i thla ka cam lai,( Salm 63) tiah a ti.

Pathian bia le a phunglam hna nih kan nunnak ah zeidah a kan pek:

  • Ka ke caah meiin a si, ka lam caah ceunak a si 119:105
  • Fimnak an ka petu saya an si 119:98-100,104
  • Kan caah RO an si, kan lung a kan lawmhtertu an si 119:111
  • him tein khua a kan saktertu le kan himnak an si 119:165

Nihin ah Khrihfabu zumtu hawi hna kan nunnak caah hin zeidah a biapi ti hi kawl in ruat ṭhan tuah hna usih. Nangmah le keimah caah cun thildang vialte nakin Pathian he caan hmanṭi tlukin a biapi deuh mi a um ti lo. Vawlei thil le ri nih Pathian ṭhatnak, dawtnak le zangfahnak kha an kan philhter sual nakhnga lo kan lungthin cu amah pe hna usih law kan nunnak zong a nungmi raithawinak bantukin a hmaiah cun i pe ko hna u si.

Chawva tampi ngeih nakin na nawlbia zulh cu ka duh deuh. Na kan hmuhsakmi thil kha ṭha tein ka ngiat hna lai i na kan cawnpiakmi thil kha ka dothlat hna… na phunglam cu ka philh hna lai lo Salm.119:14-15.

Pathian nih lam in hruai ko hna seh!