No comments yet

PATHIAN BIA CU

Kan nunnak ah ruah lo in kan um khawh lo mi biafang (or) biathluan hi a um tawn. Tahchunhnak ah, tlangval nih nungak a helh i a uarmi ngaknu sin in duhnak bia a theihmi cu chunzan in a ruat. Ruat lo in a um kho hrimhrim loh. A ruah paoh ah ho nih capo chim piak hau loin a mirh in a nuam peng ko lai (nan ton cio ko khah). Ruat hlah tiah thloh khawh zong a si lai lo.

 

Pathian Bia thlumalnak a thei tuk mi Salm caṭialtu nih tehte a khaanmi cu:

“Zeitluk in dah na phunglam cu ka duh, chun nitlak cu lawng cu ka ruat ko. Na nawlbia nih a ka umpi zungzal i ka ral vialte hna nakin a ka fim ter deuh.” Salm 119:97-98.

 

Pathian Bia cu a caah fimchimtu, ceunak petu, lam hmuhsaktu, lam hruaitu, nun lawmh tertu a si kha a hngalh tuk tikah cu kong cu ruah lo in a um kho hrimhrim lo. A lungchuah caan lawng ah a ruat lo. A huam caan lawng ah a ruat fawn lo.

 

Chun nitlak in cu lawng cu a ruat. Halleluijah!

Pathian nih a bia hmangin a dawtnak an chimh mi, zohkhenh dingah bia an kamhmi, um pi zungzal dingin bia an kamhmi le an ngaihthiamnak hna cu chun nitlak ruat hmanh, na nun ah lawmhnak le daihnak na hmu ko lai.

 

Kan cungah bia ṭhalo an chimmi kan ruah deuh paoh ah kan nun a nuam tawn lo i thinhunnak in caan kan hmang tawn. Sihmanhselaw kan cungah bia ṭha le thluachuah bia hna kan ruah a si ahcun kan caan hman a nuam i lawmhnak in kan khat ko.

 

Cucaah Pathian Bia cu kan um/ṭhutdir pah in ruat usihlaw, rian kan ṭuan pah zong in ruat ko hna usih. Kan caanhman a nuam hrimhrim ko lai.

 

Pathian daihnak nan dihlak cungah um ko seh.