No comments yet

PATHIAN BIA CU

Minung kan nunnak ah kan palhnak na palh ti a kan chim kho tu ngeih hi a biapi hringhran. Kan kal thiam lo tikah ding tein kan kal khawh nakhnga lam hmuhsaktu ngeih hi a herh hringhran. A hman mi thil kan theih khawh nakhnga fim a kan chimtu ngeih cu hopaoh nih kan duhmi a si.

Bible chungah kan hmuhmi cu:

“Ca Thiang hi a dihlak in Pathian thaw chuah hnawh mi a si i biatak cawnpiaknak caah le palhnak cawnpiaknak alnak caah le palhmi remhnak caah le dingte in nunnak ding cawnpiak caah a ṭhahnem mi a si.” II Tim. 3:16

Salm caṭialtu nih:
“Nangmah (Bawipa) cungah sualnak ka tuah nak hnga lo na bawlbia (Bia) cu ka lung chungah kaa chiah.” Salm 119:11

Khoizeika hmun hmanh ah, zei bantuk caan hmanh ah kan lung chung ah Pathian Bia kan i chiah i amah kong kan ruah ahcun cu nih cun kan nunnak ah hnangamnak le daihnak a kan pek lai. Zeicahtiah Pathian Bia nih cun biatak kha a kan cawnpiak, kan palhnak a kan remh, dingte in kan nun lam a kan hruai.

Tahchunhnak ah: “Bawipa cu tuukhal bantukin a ka vengtu a si,” timi Pathian Bia cu kan lung chungah kan i chiah tikah, motor kan mawngh, rian kan ṭuan, eidin kong ah “Bawipa cu ka tuukhal a si caah a ka ven lai i ka herhmi cu a ka pek ko lai,” ti kan theih mi nih kan nun ah hnangamnak a kan pek.

Cucaah Pathian Bia cu kan lung chungah i chiah zungzal hna usihlaw ruat zungzal ko hna usih.

Pathian daihnak nan dihlak cungah um ko seh.