Minung a simi paohpoah caah hin caan nakin a sunglawi deuhmi a um lo. Caan ṭha kan ngeihmi kan hman sualnak nih ngaihchiatnak, sunghzatlaknak le a donghnak ah cun thihnak tiang a kan phak pi.

A bik in zumtu a simi hna nangmah le keimah hrangah hin a biapi khun. Zumtu a simi hna nih kanmah kan ilawmhnak ding tiang ca lawngah caan ṭha hi a hmang ding kan si lo i satan pa sal ah a tang liomi hna an nunnak chanhchuahnak ding tiang in kan caan hna hi hman thiam a bia pi tuk. Cucaah Paul nih Efesa 5:15-16 nakah, “Zeitindah kan nuncan a si ti kha ṭha tein i zoh u. Mihrut bantukin um hlah u, mifim bantukin um u. Atu kan ni khua hi caan chia a si caah, caan ṭha nan hmuhmi paohpaoh kha ṭha tein hman izuam u.” tiah a kan chimh.

Zeiruangah dah kan caan ṭha hna hi hman thiam a herh;

• Zungzal lawmhnak le zungzal harnak hna hi caan kan hmannak cungah a um mi a si.
• Kan Nunnak Caan ṭha hna hi sau a nguhmi an si lo Jam.4:14
• Kan hmailei kongah zeidah a cang lai ti kan thei kho hna lo, zei can dah kan caan a tang ti zong kan thei kho fawn lo
• Caan ṭha kan hman ciami hna cu hmuh ṭhan ka duh tiah kawl ṭhan khawhmi an si hna lo

Cucaah cun Pathian nih nangmah sin teah an pekmi caan ṭha hna hi a ṭhabik in hman zia thiam ding hi kan bible nih a kan cawnpiak. Paul nih Efesa Khrifabu hna cu caan ṭha nan ngeihmi hna hi santhaihnak a chuahpi lo mi an si sual lai ti a phannak kong kha a chimh hna, “Bawipa nih tuah hna she ti an duhmi hna tu kha tuah i zuam u” (5:17), tiah thazang a pek hna bantukin kan nih zong kan caan ṭha hna hi man a ngeimi siter hi a biapi tuk. Sunglawi tein kan minung hawi hna sin ah caan hmang thiammi si hna u sih.

1John 2:17 “Vawlei le a chung i a ummi thil minung nih an duhmi hna hi an lo cuahmah cang; sihmanhsehlaw Pathian duhnak a tuahmi cu zungzal in an nung.”

Pathian daihnak le a vel nan dihlak cungah um ko seh. Amen.