Jesuh cu a zultu hna he thawngtha chimnak ah khual an tlawn lio ah Bethani khua ah a um mi Mari le a u Martha nih bia an hei cah i “ Bawipa , na dawtmi na hawi kha a zaw”( Johan 11:3 ) an ti. Bawipa, na hawi kha a zaw ti sawhsawh lawng si lo in na dawt mi tiah an telh chih. Johan 11: 5 “ Jesuh nih Martha le a nau nu le Lazaruth kha a dawt hna” tiah kan hmuh.
Jesuh nih a dawt mi Lazaruth cu a zaw tiah a theih ko nain nihnih a caam rih ( Johan 11:6). Mari le a u Martha nih Jesuh cu rak ra zawkzawk sehlaw, an tapa dam ter zau seh tiah an duh tuk ko nain Jesuh cu nihnih a caam rih. Kan duhmi thil hi a tu ah cang seh/tlamtling seh tiah kan duh dih hna . Pathian nih a kan tinhpiak mi caan cu hnawhkhawh a si lo. Amah caan te ah thil a tuahtu Pathian a si caah zumtu hna nih lungsau tein Pathian caan hi kan hngah ding hi biapi tuk mi a si.
Abraham cu Pathian nih a tinhpiak mi caan hngak lo in a mah duhning le ruahning in a tuah ruangah a innchungkhar ah buainak a chuak ( Genesis Dal 16 , Dal 21).
Sihmanhsehlaw,David cu siangpahrang sinak ding caah chiti thuh a si hnu in kum 15 a hngah hnu ah siangpahrang a tuan. Joseph cu Pathian nih hmailei a sinak ding mang in a chimh chung. Pathian pek mi mang a tlin khawh nakhnga ding caah kum (14) a hngah.
India ram ah ram thar riantuantu William Carey le Myanmar ram ah ramthar riantuantu Adoniram Judson cu kum (7) an tuan hnu ah thlarau tlau an tleih. Westeren Africa ah Pathian rian a tuan mi zong kum (14) hnu ah thlarau tlau a tleih. New Zealand ram ah Pathian riantuan hmasa mi hna zong kum (9) hnu lawng ah thlarau tlau a tleih. Tahiti ram ah Pathian rian a tuan mi zong kum (16) hnu lawng ah thlarau a tleih.
Pathian nih a kan tinhpiak mi hi nihin zong ah a tling ko. Thaizing, hmai zarh, hmai thla, hmai kum silo le kum caan sau hnu zong ah a tling ko mi a si. Zumtu fale hna nih cun phunzai lo tein Pathian tinhpiak mi hi lungsaute le lungawtawm lo tein kan hngak ding hi kan rian a si. Zumtu hna zong cu lungdong lo tein Pathian thil ti khawhnak chungah kan zumhnak a bunh peng ding kan si.
Salm 37: 7, “ Bawipa hmai ah cun daite in um ko law, zeidah a tuah lai ti kha lungsau in ngak ko.”
Bawipa ser piak mi ni sunglawi hman nuam tuk uh!