No comments yet

LAM HMUHSAKTU ṬHA PATHIAN

Profet Isaiah cauk chung kan zoh tikah Israelmi hna nih harnak le lungdonghnak chung i an rak um cia nak le an ton ṭhan lai dingmi kong kha tampi a chimhnak kan hmuh.An ral hna nih sal i an tleih lai nak hna ding kong siseh, an umnak ram chuahtak in mi ram dang an phanh lainak kong siseh, Sal rianṭuan in lung dong ngai i an um lio caan le ruahchannak pakhat te hmanh ngei lo in an um lio caan kong te hna kha tampi kan hmuh.

Sihmanhsehlaw cu bantukin an um lio caan teah a thimtu hna Pathian nih cun hi tihin bia kamhnak a pek hna. Siangpahrang le hruaitu vawlei ah ngeihmanh hlah u law, “Keimah Bawipa cu nan Pathian thiang ka si, Israel, nangmah an sertu cu keimah ka si i na siangpahrang cu keimah ka si, a ti” (43:15).Na thin phang hlah an umpi tu le na sining an thei bik tu cu keimah hi ka si, kan domh ṭhan lai i kan khamh ṭhan lai. Nan pupa chan ah rilisen atan pitu hna cu keimah ka si kha philh hlah u.

Pathian nih bia a kamh rih mi hna cu, a um ciami thil le ka rak tuah ciami thil lawng kha irinh hlah u, nan caah “thilthar ka tuah dingtu kha i ngiat u” (43:19), lam a umlo mi hmun in lam thar kan serpiak hna lai tiah Pathian nih Israelmi cu bia a kamh hna. Amen. “Ramcar chungin lam pakhat ka kalter lai i cuka ah cun tiva luang kan pek hna lai” tiah Pathian nih a ti.

Cucaah Khrifabu hna ni hinah kan nunnak le kan sining hi kan minung hawi hna nih cun an kan theithlu kho lo, kan nupi le pasal le zongnih an kan hngal thlu kho taktak lo. Kan harnak, kan lung donghnak, chimpit van sang au in kan um lio can zong ah kan sining a kan hngaltu le a kan philh lo i kan sin teah a kan umpi kho tu cu kan Pathian lawnglawng hi a si. Kan lam a dongh caan ah lamthar a kan serpiak ṭhan khotu cu amah lawng a si.

Exodus14:13-14 “Nan thin phang hlah u! fek tein dir u law nanmah khamh awkah Bawipa nih zeidah nihin ah a tuah lai kha zoh tuah u: cu a tuah laimi cu hihi a silai, nihin i nan hmuhmi Izipt mi hna hi zeitikhmah ah nan hmu than ti hna lai lo. Bawipa nih nan ral cu an doh piak hna lai, nan nih cu zeihmanh nan tuah a herh lai lo, a ti.” Amen. Kan nih cu amah caah sermi kan si bantukin a kan ngeitu Pathian nih hin kanmah te lawngin umter le hartuarter hi a kan siang lo. A kan kaltak bello i a kan hlaw bel fawn lai lo, cucu a bia kam asi. Amah cu ruahchannak lamthar chungah a kan luhpi tu le hruaitu ṭha Pathian a si.

Pathian vel le daihnak nan dihlak cungah um ko seh.