“Ka chuah hlan in na rak ka hmuh diam cang. Ka ca i na ser mi ni hna cu na cauk chungah an rak i khumh diam cang, hram an i thawh hlan hmanh khan an i khumh diam cang. Maw Pathian, na ruahnak cu ka caah zeitluk in dah hngalh a har, na ruahnak cu a tam tuk ah a dongh in a dong kho lo.” Salm 139:16-17

Minung kan nunnak ah kan nulepa, kan nupi/pasal, kan hawikom ṭhabik zong kan chimh ngam hna lo mi harnak, fahnak, ngaihchiatnak, nganfahnak hna hi kan ton tawn ko. Cu bantuk caan ah ho tal nih ka kong an ruat hnga maw? tiah biahalnak zong kan ngei tawn.

Franke E. Graeff cu Methodist Church ah Pathian rian a ṭuan mi a si. A nun ah harnak, fahnak, lunghrinhnak tampi a tong. Biahalnak a ngeih mi cu:

“Ka lungre a theih tikah i ka thil a rih tikah,
ka lam a har i ka lam a muih tikah,
tukforhnak ka in i zan khuadei lungre thei mitthli tla in ka um tikah,”
Bawi Jesuh nih a ka ruat hnga maw? ti hi a si.

Bible cauk (Pathian bia) a van kau i, “Amah nih an zohkhenh ko hna caah nan lungre theihnak vialte cu amah cungah chia dih ko u,” (I Pet. 5:7) a rel. A biahalnak cu hitihin amah nih a leh:

“Asi, Bawi Jesuh nih ka kong a ka ruah cu ka hngalh.
ka tonmi harnak ruangah nitlak cu har in zan cu sau hmanh sehlaw,
ka khamh Bawi Jesuh nih ka kong a ka ruah ko.”

Mah cucu hla in a ser i kan sak tawnmi KH. 349 “Jesuh Nih A Ka Ruat Hnga Maw?” ti mi cu a si.

Van lei vawlei sertu, zeizong vialte cungah nawlngeitu Pathian nih kan kong a kan ruah peng. Kan kong le kan zawn a kan ruattu Pathian Nung kan ngeih caah kan hnangam ko hna usih. Pathian nih nangmah kong, na chungkhar kong, na sianginn kainak kong, na rian kong, na ngandamnak kong a ruah ko.

Nan dihlak cungah Pathian daihnak um ko seh.