“Nan ca i ka tinh mi cu keimah lawnglawng nih ka hngalh, tiah Bawipa nih a ti. Cucu vanchiatnak siloin thluachuahnak a si lai.” Jeremiah 29:11

Nulepa nih kan fale caah timh piakmi le saduhthah piakmi a ngei lo kan um lai lo. Kan fale caah kan duhmi le kan timh piakmi hna cu thil ṭha le thluachuah vanluh an hmuh nakhnga, hmailei ah bochan awk a tlakmi tbk an si ko hnga. A tawinak cun an caah thil ṭha kha kan timh piakmi hna cu a si ko.

Kan Bawipa Jesuh Khrih nih;
“Hal u law an in pek hna lai, kawl u law nan hmuh lai, king ulaw innka cu an in hun piak hna lai. Zeicahtiah a hal mi paoh cu pek an si lai i a kawl mi paoh nih cun an hmuh lai i a kingtu paoh cu innka kha hun piak an si lai. Nan fale nih changreu an in hal hna tikah lung a pe mi nan um hnga maw? Nga in hal hna sehlaw, rul nan pe hna hnga maw? Hi tluk in nan ṭhalo ko nain, nanmah hmanh nih nan fale kha thil ṭha pek nan hngalh ahcun, vancung khua i a ummi nan Pa chinchin nih cun zeitluk in dah thil ṭha cu a hal mi kha a pek chinchin hna lai!” Matt. 7:7-11.
Fale nih ka nulepa, na ka timh piakmi zeidah a si ti hi kan hal lem hna lo. Kan hal hna lo tikah kan thei tawn lo i ka nulepa nih ka zawn an ka ruat lo tiah kan ruah tawn. Cu bangin Pathian nih kan caah timhmi a ngei ko nain kan hal tawn lo.

Bawipa, na ka timh piakmi zeidah a si? Tuni ah zeidah tuah seh ti na ka duh? tiah thlacamnak in kan hal a si ahcun a kan timh piakmi cu kan theih/hngalh lai i a sunparnak cu kan nunnak ah a lang ko lai.
Pathian daihnak nan dihlak cungah um ko seh.