Nikhat ah 1440 minutes a um. Second in 86,400 a um. 1440 minutes ( seconds 86,400) hi kan nunnak ban ( bank) chung ah Bawipa nih nihin ah a kan rawn piak than. Bawipa min thangthat si ko seh! Nihin ( 1 September 2020) hi zeitik hmanh ah kan hmuh than kho ti lai lo. Khirh than kan duh zong ah kan khirh than kho ti lai lo. Liam rih hlah ti zong ah tleih awk a tha lo mi le thloh awk a tha lo mi a si. A mah le a caan te ah a liam dingmi ni a si.
Cucaah, hi caan sunglawi a co tingtu nangmah le keimah nih sullam ngei tein kan hman thiam a hau. Mi a ngaithiam lomi nih ngaihthiamnak ah hmang hna u sihlaw, Thinhunmi nih thin damnak ah hmang hna u sih, a uai cangmi dawtnak a ngei mi nih a dawhmi a par chuahter than hna u sih, dawtnak bia chim a daithlangmi nih dawtnak bia chim ni( day)ah hmang hna u sih, lunglomhnak bia a chim manh rih lo mi nih chim ni ( day) ah hmang hna u sih.
Bawipa dawtnak a rak thei cang ko nain a tlu thanmi hna nih thawh thannak ah hmang hna u sih, Bawipa dawtnak a cohlang rihlo mi nih Bawipa dawtnak, cohlannak ah hmang hna u sih. Pastorte, khrihfabu hruaitu hna, miphun le ram caah thla a cam lo mi nih thlacamnak ah hmang hna u sih.
Phungthlukbiak 27: 1 “ Thaizing kong kha i porhlaw hlah, cu ni nih zei a chuahpi lai kha na hngal lo.” Ka rak tuah dingmi ka tuah lo caah ka ngaichih tuk ti mi nih hmunhma a lak hlan ah Nihin kan tuah dingmi tuah cio hna u sih tiah hi thawngtha hin kan sawm hna.
Bawipa nih a Bia thluachuahnak kan pek piak ko seh.