Minung kan si batukin kan hrial khawh bak lomi cu ṭihnak hi a si. Nifate kan nunnak ah cu bantuk ṭihnak nih cun a kan zelh.Tihnak bia fang kan chim tikah hin phun hnih in a um. Vawlei nih a chuahpi mi ṭihnak le Pathian ṭihnak ti in.

Vawlei nih a kan pekmi ṭihnak hna cu, kan tuah ciami sualnak ruangah siseh, zawtfahnak rai ruangah siseh, rian ngeih lo phan ruangah siseh, chungkhar dirhmun ruangah siseh, mi nih hlawtmi si kan phan ruangah siseh, kan hmailei ah zeidah kan ton lai ti theih lo ruangah, tiin a phunphun ruangah kan lungre a thei i kan nunnak cu ṭihnak nih chum bangin a kan zelh. Cucu vawlei nih a kan pekmi ṭihnak an si i vawlei thilri in teikhawhnak thazang kan ngei hrim hrim hna lo.

Apahnihnak ṭihnak tu cu, ‘ Pathian ṭih’ hi a si. Pathian ṭihnak nih kan ca hrangah hlawhnak le ralṭhatnak, kan ral teikhawhnak thazang tu a kan pek (2Tim.1:7). Pathian ṭih kan timi cu, a hmaika ah ther lengmang le phang leng mang in va um kha a si lo, dantatnak kan hmu sual lai ti phan ruang i ṭih zong kha a si fawn lo. Pathian ṭih cu, ‘a sinak tling hngalh le a lianngannak le a ṭhawnnak hna kha upatnak pek i kan nunnak in langhter kha a si. Amah kha kan thinlung dihlak in dawt, a lungton le a duhmi tuah kha izuam, le kan nunnak in siseh, kan tuahser nakin siseh, a ngeih kan chiatter lo kha Pathian ṭih cu a si. Phun dang in kan chim a si ahcun, Pathian tih cu na uktu le Bawi ah ser i amah lamhruainak chungah zakhat ah zakhat bakin kan nunnak chiah kha Pathian tih cu a si.’(1John 4:18)

Pathian kan ṭihnak cu kan ca hrangah nunnak hrampi a kan petu a si lawng siloin fimnak le hngalhnak ah a kan ṭhanter (Salm 111:10),hnangamnak, lungsinak le daihnak a kan pek ( Phungthlukbia 19:23), kan nunnak cerhti a si (Phungthlukbia 14:27) i Bawipa ṭih cu kan nunnak ah himnak a kan petu a si ( Phungthlukbia 14:26).

Pathian ai bochanmi hna le a ṭihmi hna nunnak chungah cun, ṭihnak le lungretheihnak nih hmunhma a ngei ve lo. Pathian kha idornak ah an iser i ral thongtampi nih kulh ko hmanh hna seh law Pathian ṭhatnak le dawtnak cu an rawl thaw bik a si i a fekmi an zumhnak cu an ral teinak tanbo ah an hman caah hnangamnak le daihnak in an nun cu a khat (Salm 23).

“Daihnak kan chiahtak hna, Keimah daihnak cu kan pek hna. Vawlei nih an pek hna bantukin kan pe hna lo. Lungrethei le vansang au in um hlah u; nan thin zong phang hlah u” (John 15:27).

Bawipa nih teinak nun chungah lam in hruai ko hna seh law, daihnak, le thluahchuahnak in pe ko hna seh. Amen.