BOCHAN TLAK BAWIPA DAWTNAK

“Bawipa nih rangtum ṭhawngṭhawng hi biapi ah a ruah mi an si lo, ralkap a ralṭha mi hi a lomh mi an si fawn lo, a si nain a lung a tong mi cu amah a ṭih mi le a fek mi a dawtnak aa bochan mi kha an si.” Salm 147:10-11

Pathian nih Israel mi hna cu lam a hruai hna, an herhmi thluachuahnak a pek hna. An ral a tei piak hna. Sihmanhsehlaw caan sau deuh khua an sak tik ah Pathian nak in thil dang an i bochan deuh cang. Ral tei nak ding ah:

1. Rangtum ṭhawngṭhawng le
2. Ralkap ṭhaṭha ngeih kha biapi deuh ah an ruah cang. Teinak a rak petu hna Bawipa

Pathian nak in rangtum ṭha le ralkap ṭha kha an i bochan deuh.

Cu tikah Bawipa Pathian nih nan rangtum le nan ralkap hi biapi ah ka chiah mi an si lo. Nan i bochan mi hi bochan tlak taktak an si lo.

Ka duh mi cu:

1. Nan ka ṭih le
2. A fekmi ka dawtnak nan i bochan hi a si tiah a ti hna.

Vawlei pi nih a ton mi covid-19 (pandemic) chung ah siibawi le siiai hi i bochan deuh a fawi te. Kan harsatnak chung in luat nak ding ah ngeihchiah chawva, sui le ngun, fimnak biapi deuh ah chiah a fawi te. Bawipa Pathian nih a kan duh piak mi cu amah ṬIH le A FEKMI A DAWTNAK BOCHAN hi a si.

“Pathian na ṬIH ahcun zeizong vialte hi a ṭha dih ko lai.” Phungchimtu 8:12

“Bawipa DAWTNAK a fek mi cu a dong hrimhrim lai lo. A ZAANGFAHNAK zong a cat lai lo; Zing fate in an thar lengmang, zumhtlak a si nak cu a lianngan hringhran.” Tahnak Hla 3:22-23

Amah kan ṬIH nak cu cozah nih zulh ding an chiah mi zulhnak in langhter usihlaw a fekmi a dawtnak cu i bochan ko hna usih. Teinak cu Bawipa Pathian ta a si. Amah nih cun teinak a kan pek ko lai.

Pathian daihnak nan dihlak cung ah um ko seh. Amen.