Pathian Bia ah kan hmuhmi cu “ zeizong vialte nih caan an ngeih” ( Phungchimtu 3:1). Vawlei cung kan nun chung ah lomhnak caan a um bantuk in ngaihchiatnak caan a um ve, thawngpang tha kan theih caan a um bantuk in thawngpang chia kan theih caan a um ve. Kan nih caan a um bantuk in kan tah caan a um ve.
Baibal chung ah thawngpang chia a dongmi, ngaihchiatnak a tongmi hna tampi an um. Cu thawngpang chia an don caan le ngaihchiatnak an ton caan ah a hodah an fuh ti mi hmangin thazang I lak ti hna u sih tiah kan sawm hna.
Job cu Pathian nih rosung a pek mi a fapa hna le a fanu hna cu nikhat ah an thih dih. A ngeihchiah vialte nikhat ah an lo tlau dih. Cu thawngpang chia a theih tikah zeizong vialte ngeitu Pathian a fuh. A donghnak ahcun Pathian nih a lethnih in thluachuahnak a pek.
David siangpahrang cu Bathsheba he an ngeih mi a fapa a dam khawh nakhnga rawlulh in thlacamnak a ngei nain a fapa cu a thi. Asinain Pathian a fuh panh thiamthiam caah Bethshiba he a ngeih than mi an fapa Solomon cu Isreal siangpahrang ah a cang.
Persia siangpahrang sin ah rian a tuanmi Nehemiah cu a Jerusalem kulhnak vanpang a cimhnak le kutka hna an kang dih ti thawng a theih tikah siangpahrang fuh panh hmasa lo in zeizong vialte tuah khotu Pathian a fuh panh caah a rawk cangmi an ram cu Bawipa nih remhnak caan tha a pek than.
Nihin ah kan tonmi covid-19 zawtnak siseh, pumpak nih kan ton cio mi thil ( Ngaihchiatnak, thawngpang chia theihnak le thil dang kong) ah hin Bawipa fuh panhtu si hram hna u sih tiah hi thawngtha hin kan sawm hna.
Salm 121:1 “ Tlang khi ka hei cuan hna i,khuazei in dah bomhnak ka hmuh lai? ka ti. Bomhnak ka hmuh dingmi cu Bawipa sin in a ra lai.”
Pathian ser piakmi ni sunglawi hmang nuam tuh uh!