Pathian he kan i pehtlaihnak ah kan ral ngan bik le donkhantu nganpi pakhat cu a liam cia kan nunnak, i mawngh ter hi a si. A liam cia kan nunnak , kan i mawnghter tikah i phuhrunnak, ralchiatnak nih hmunhma a lak i, biakinn kal duhnak lungthin le Pathian thangthat duhnak lungthin a kan ngeihter kho ti lo I kan thlarau nun a hul ter.

Cu bantuk thiamthiam in kan pawngkam um mi hna he kan i pehtlaihnak ah thil hrawktu le thil tha lo a chuahpi pakhat cu a liam cia mi thil hna , i mawnghternak hi a si. A liam cia thil hna nih a kan mawngh tikah lungfahnak, ngaihchiatnak, thinhunnak, teirul chap duhnak, ithennak, i hmuhthiam lonak etc.. pawl a chuahter lawng si loin nifate kan nunnak ah lomhnak nih hmunhma a la kho ti lo.

A liam cia kan nunnak nih a chuahpi mi phuhrunnak , hawi hmaikhah lonak le ralchiatnak vialte hlonh dih I, raltha tein Pathian hmai ah chuah dingin Bible nih a kan cawnpiak ( Heb 4:14; Efesa 3:12). Zei ruangah dah raltha tein kan chuah lai? A liam cia kan palhnak, sualnak vialte cu Jesuh thawngin ngaihthiam kan si cang ( Efesa 1:7), Nichuahlei le nitlaklei an I hlat tluk khin kan sualnak cu kanmah he i hlat ah a kan thial piak ( Salm 103:12). Pathian nih kan sualnak vialte a kan hnawh piak cang ( Isaiah 43:25).

Lot nupi bantuk in kal tak cangmi nun nih mawngh i, cite tung ah a cangmi si loin , Pawl bantukin Pathian nih tinhpiak mi laksawng hmu ding ah hmailei ah tlik ( Filipi 3: 13-14) i zuam cio hna u sih. Pathian nih a kan ser piak mi ni sunglawi nuam tein nan hman cio khawh nakhnga thlacam piaknak he,